Berlai é música galega rururbana. Un proxecto musical creado por Xiao Berlai. Música sen complexos que bebe da tradición galega, do indie-pop, do rock, da música electrónica… As cancións nacen de imaxes obsesivas do universo galego: verzas urbanas, millo con fitas de balizamento policial… e por outro lado cheas de retranca, humor, alegría; mais sobre todo, amor. No concerto pódese gozar da música de Berlai nun espectáculo cargado de ironía e bo humor. Música directa e chea de paixón. Mesturando realismo cru e obsceno co lirismo máis refinado cando é necesario.
