Blue Merrow naceu en setembro de 2019 en Pontevedra, un proxecto concibido co obxectivo de crear e interpretar música baseada na improvisación. Aos marinenses Damián Garrido como letrista, vocalista e percusionista e Ángel Olañeta, como guitarra solista, súmanse Ángel Vexo –teclista e organista–, Diego Hernán Ruiz –baixo– e Alberto Cid –batería–.

Cunhas pautas que chegan aos seus músicos de grupos de finais dos sesenta e principios dos setenta, o resultado é un espazo musical sen outra limitación que a que definen os solistas da banda: órgano e guitarra eléctrica. A base rítmica (baixo, batería, percusión) acompaña ritmos baseados en melodías de blues e acentos clásicos do hard rock que o oínte poderá identificar nos directos. As enigmáticas letras aportan outro elemento a este grupo, que publicou o seu primeiro disco en xaneiro de 2022.