Claudio H. Mestís Galiza é un proxecto especialmente pensado para o panorama galego liderado por Claudio H., músico, guitarrista, cantante, compositor, autor, arranxista, contrabaixista, produtor e poeta nado en Bos Aires e residente en España dende 1989.

Na proposta que o arxentino presenta ao FAM 2024, acompáñano en formato trío recoñecidos músicos da escena local máis actual, Quim Farinha – violín– , e Carlos Freire – percusión– .

O seu directo quere darlle un aire novo ás cancións de Claudio, unha textura e cor diferente e, sobre todo, a sempre luminosa faísca da creación colectiva. O concepto baséase en catro piares; unha sección rítmica sólida e danzante, o son con aire celta que imprime o exquisito violín de Quim Farinha, a elaborada e sempre sorprendente melodía e a poesía dunha coidada letra.

Poderíase engadir un quinto; a complicidade, o xogo, as ganas e o pracer de compartir, e a boa sintonía de tres artistas que se divirten co que fan. O traballo de investigación é permanente. Así se destila un resultado sempre fresco e á vez elaborado que compre non perder.