Factoría de Subsistencia é unha banda liderada polo actor Josito Porto e nesta edición de FAM presentan o seu “Respirando…sempre!”, o novo traballo da agrupación, o terceiro na carreira deste grupo. Presentouse ao gran público o 13 de xaneiro na Casa das Crechas en Santiago de Compostela e, cun concerto moi especial, o 20 de xaneiro no propio estudo no que gravaron estes nove temas en Vilagarcía.

Logo de dous álbums que xa situaban a FdS dentro da estela dos grupos a ter en conta, neste terceiro traballo, o binomio musical formado por Sabela Dacal (acordeón e coros) e o propio Josito (voz e guitarra), está marabillosamente reforzado coa presenza de Rafa Otero (baixo) e Adrián Ríos (batería). Destacar tamén a presenza dos teclados executados por Sabela Dacal.

Contaron co bo facer de Pablo Vidal aos mandos do Estudo Aldeaglobal en Vilagarcía que se encargou de darlle unha volta máis roqueira a uns tema que xa chegaron moi traballados polo grupo. Pablo encargouse tamén de darlle ese aire de respiro ao disco, ese aire que tanto precisamos e que tanto ben nos fai. Yeya Gilino encargouse da parte gráfica da proposta.

Está claro que Josito sempre se soubo rodear de xente fantástica, xente pola que paga a pena SEGUIR RESPIRANDO.