Pablo Leira, con apenas 23 anos, vén de cursar un título en interpretación de guitarra no Berklee College of Music, en Boston, onde recibiu unha bolsa e obtivo premios como o John Laporta en 2019 e o premio Jimi Hendrix en 2020.

Preséntanos nesta edición do FAM o seu «Dirt, Wood & Grass» (Ferror Records, 2023), disco de debut que aúna detalles do son americano e o folk mediante un toque persoal fascinante, cantando e tocando case todo coa axuda de músicos ferroláns de prestixio. En total nove cancións conmovedoras, con elevadas doses de intimismo, a base de preciosas melodías cantadas con magnífica voz e envoltas en marabillosos arranxos instrumentais interpretados coa axuda dalgúns instrumentistas de auténtico luxo, no estudo e en directo, que poderá gozarse este mes de agosto na cidade vella de Compostela.