Tras 27 anos de carreira, os grandes referentes do ‘rock do país’ están no mellor momento da súa historia, cunha evolución significativa no seu son, abríndose a novas influencias e estéticas que, en realidade, consolidan o seu xeito único de facer música. Actitude punk e amor polo noso nun dos directos máis sólidos do rock galego.

A banda é sen dúbida un referente do rock galego, movéndose á marxe dos grandes poderes da cultura, das modas e do politicamente correcto. “Co espírito de loita por bandeira, do rock do país, do rock libre e de combate, do realismo máxico e do corpo a corpo sincero, directo e emocional”, a esencia do ADN dos Ruxe Ruxe queda patente en cada disco editado e en cada concerto que deron dende os seus inicios. O grupo naceu en Aríns en 1996 con catro amigos do instituto, tres dos cales (Xan Pericán, Xaco Barona e Vituco Neira) conforman agora o núcleo veterano da banda. Ademais de 14 LP’s, teñen varios EP’s, unha banda sonora, unha curtametraxe, un documentario sobre o grupo, un cómic e incontábeis colaboracións, ademais do disco tributo “25 anos ruxindo” co que 32 bandas galegas rendéronlles homenaxe.

En marzo do 2023, presentaron “Unha noite no interior dunha faísca” (Lobicán Records), o seu agardado novo disco, unha evolución e un cambio significativo no son da banda que poderá gozarse no directo do FAM 2024.