Tacón Gitano é flamenco, pero non un flamenco calquera, é a voz dun pobo, o pobo xitano. Un pobo que soubo conservar ata os nosos días unha forma de vida e unha cultura propias. Un pobo que expresa como ninguén os seus sentimentos feitos música. As súas penas e alegrías xa son patrimonio da humanidade e inundan case calquera recuncho do planeta de beleza e arte. Desde os paus máis tradicionais ata os máis modernos danse cita nunha hora de espectáculo fresco, natural, sen máis pretensión que a de ser un mesmo. Sen outro propósito que o de compartir o propio co espectador. Unha viaxe única, un deleite para os sentidos.