Seguro que algunha vez te preguntaches sobre que discuten eses descoñecidos cos que te cruzas, onde se coñeceu aquela parella ou por que fala soa esa persoa. Se é así, XENTE é o espectáculo que estabas esperando.

En XENTE, a praza convértese no escenario e as persoas que pasan convértense nos protagonistas. As historias xurden do movemento dos transeúntes, das súas conversas, dos seus xestos.  Que a túa imaxinación voe coa nosa. Acompáñanos nesta viaxe pola poesía da rúa, o amor, as intimidades, a risa e os momentos surrealistas que che farán pasar da gargallada á pura emoción a cada intre.

XENTE xunta o mellor do happening e do teatro de rúa coa improvisación teatral, nun formato tan orixinal, fresco e divertido, que cambiará o teu xeito de pasear e de mirar á xente coa que te cruzas.

Do teatro de rúa máis puro, un dos actores interactúa coas persoas que pasan, xerando situacións e imaxes, mentres os outros dous dialogan estas escenas, creando historias tenras, divertidas, asombrosas, momentos que nunca imaxinaches que poderían suceder, pero que xa nunca poderás esquecer.